LAOAG CITY – Mangisayangkat ti mass Cardiopulmonary Resuscitation demonstration para iti National CPR Day inton Hulio 17 ti Philippine Red Cross (PRC) tapno maitandudo ti kinapateg ti Cardiopulmonary Resuscitation (CPR) iti panangisalakan kadagiti biag ken papigsaen ti panawagan daytoy para iti ad-adu pay a first aider.
Iti Proclamation 551 ket naideklara ti maika-17 ti Hulio kas National CPR Day.
Ti simultaneous Cardiopulmonary Resuscitation demonstration ket ma-access iti babaen ti online page ti Philippine Red Cross ken Zoom no sadino maisuro kadagiti makipaset no kasano ti umiso a panangiyuswat ti Cardiopulmonary Resuscitation.
Maduktalanda pay no kasano ti agaramid ti improvised Cardiopulmonary Resuscitation a manikin manipud kadagiti recyclable a materiales.
Malaksid iti Cardiopulmonary Resuscitation demonstration ken awareness campaign, manamnama nga idauloan ti Philippine Red Cross ti ad-adu pay nga aktibidad a pang-edukasion ken napnoan ti pakaragsakan iti online babaen iti panagkikinnammayet dagiti 102 chapters daytoy iti intero a lubong.
Kabayatanna, daytoy nga aktibidad ket kas panangipakita ti suporta iti pannakaipatungpal ti Republic Act No. 10871, maysa a linteg a mangipapaay kadagiti umili ti kasapulanda a maammoan ken panagsanay tapno tumulong iti emergency iti salun-at.
