LAOAG CITY – Minilyon a tattao ti maibilang kas regular coffee drinkers iti intero a lubong.
Kaadoan kadagitoy ket kaykayat da ti agkape iti bigat tapno mamurmurayan da ken maalay-ayan ti pannakabannog da.
Mainaig iti daytoy, naduktalan iti panagadal a ti panagkonsumo iti ad-ado a caffeine kas iti kape, tea ken cocoa ket makatulong para iti nasalsalun-at a blood vessel.
Ti regular a panaginom ti kape ket makatulong tapno maipababa dagiti dadduma a pangta iti salun-at kas ti sakit iti puso ken makissayan ti posibilidad a panagpasar ti coronary heart disease kangrunaan na dagiti babbai.
Nupay kasta, saan latta a maliklikan nga adda met ti negatibo nga epekto iti panaginom ti kape kadagiti dadduma nga indibidual kas iti mabalin a maipangato ti pangta a maaddaan ti maysa a tao ti heartburn, anxiety, masansan a panagisbo ken palpitation.
