LAOAG CITY – Maikatlo ti Rehiyon Uno iti intero a Pilipinas para iti jab immunization wenno pannakabakuna dagiti ubbing.
Daytoy ti inrakurak ni Dr. Paula Sy Dionco, Director iti Department of Health – Region I.
Inlawlawag ni Dionco a gapu iti kalikagom a magun-od ti 90 a porsiento dagiti mabakunaan iti rehiyon uno ket nagtitinnulong dagiti lokal a gobierno babaen ti panangipasa da ti ordinansa para iti daytoy nga addang.
Kuna na nga adda ti agarop 78 a ribo nga ubbing a nabakunaan iti Rehiyon Uno idi 2024.
Innayon na a ti pannakabakuna dagiti ubbing ket saan laeng a mangsalaknib kadakuada manipod iti nagduduma a sakit bayat nga ubbing pay dagitoy no di ket agingga a dumakkel da
Mainaig iti daytoy, nagyaman ni Dionco nga iti agdama ket manmano laengen dagiti agkedked a mangpabakuna kadagiti annak da gapu iti amakda iti possible a negatibo nga itunda ti bakuna.
