LAOAG CITY – Maragsakan ni Mayor Joseph de Lara iti ili ti Solsona iti panangibasura ti Ombudsman ti reklamo naipila kontra kenkuana gapu iti maipagarop a panaglabsing na iti Article 220 of the Revised Penal Code mainaig iti Illegal use of public funds or property ken grave abuse of authority.
Daytoy ket mainaig iti maipagarop a panangdadael ti mayor iti plaza iti ili ti Solsona.
Inpalgak na a sakbay pay a naawat na ti immuna a subpoena ket kompleto ti iggem na a dokumento a mangipaneknek a saanna a pinerdi ti plaza iti ili da.
Inpetteng na a saanna a pinerdi ti plaza na no di ket dagiti nangireklamo kenkuana ti nangdadael.
Karaman kadagiti nagpila ti reklamo kontra ken ni de Lara ket isuda Konsehal Nestor M. dela Cruz, Mark Dennis del Castillo, Jovencio Pascua, Joselito Martin, Ceasar Paul Parado ken ni Reynaldo Mariano.
Inpetteng ni Mayor de Lara a kalpasan a naibasura ti reklamo kontra kenkuana ket isuna met ti sumublat nga agpila ti kaso kontra kadagiti complainants no sadinno a mabalin na a pilaan dagiti maseknan ti malicious prosecution.
Mainaig iti daytoy, kuna ti Mayor a ti panangipila dagiti maseknan ti reklamo kontra kenkuana ket maipanggep laeng ti pulitika.
