LAOAG CITY – Inlawlawag ni Barangay Kagawad Aurelio Galapia, iti Brgy. Callaguip iti ili ti Paoay nga adda ti sistema nga isuda nga opisyal ti barangay ti mapan agbayad iti bill ti kuryente dagiti kabarangayan da.
Daytoy ket gapu iti reklamo ti kabarangayan na a naputolan ti kuryente nupay naited na ti bayad na kadagiti opisyal ti barangay.
Segun kenni Galapia, saan na pay a nakasarita ti barangay treasurer mainaig iti naputulan a kabarangayan na.
Inbatad na a nakurang dagiti simmangpet a resibo dagiti kabarangayan da ken dagus nga inbilin na iti treasurer a makisarita iti INEC.
Kuna na a saan a damo a mapasamak daytoy.
Inbunannag ni Galapia nga adda ti pannakaladaw ti panagbayad ti treasurer iti bill ti kuryente gapu ti kumikom na ken adda pay dagiti agipakamakam.
Inabunaran da iti multa gapu ti pannakaladaw a nabayadan ti bill dagiti kabarangayan da.
Kalikagum ni Galapia a mapagsungbat ti treasurer no apay nga adda ti naputulan ti kuryente.
