LAOAG CITY – Inrakurak ti Office of the Ombudsman a dumalan pay laeng nga umuna iti naig-iget a proseso ti imbestigasion ti insubmitir a baro a rekomendasion ti Department of Public Works and Highways ken Independent Commission for Infrastructure iti opisinada.
Inbatad ni Ombudsman Jesus Crispin ‘Boying’ Remulla, kasapulan a dumalan pay iti ‘fact finding’ ken evaluation.
Inpettengna a saan a basta laeng nga ipila kas ‘complaint’ wenno reklamo ken ikabil iti preliminary investigation ti awan ti umdas ken natibker nga ebidensia.
Nupay kasta, inlawlawagna a no kumpleto dagiti ebidensia, mabalin daytoyen a tumakder kas kaso ken naan-anay a maipila iti maseknan a korte.
Inpasa ti Department of Public Works and Highways kabinnulig ti Independent Commission for Infrastructure ti ‘joint referral’ dagitoy tapno kasoan iti Ombudsman da dati nga House Speaker Martin Romualdez ken Zaldy Co.
Inrekomendarda a makasoan dagitoy ti plunder, graft ken direct bribery mainaig iti pannakairamanda iti maanomalya a flood control projects.
Gapu iti daytoy, kuna ni Ombudsman Remulla a ti ‘timetable’ iti pannakaiproseso ti rekomendasion a posible nga agpaut ti lima a bulan wenno no maisapsapa ket 90 nga aldaw.
Kunana a gagem nga aramiden laeng iti dua a bulan ti pannakaiwayat ti fact finding ken sabali nga 60 nga aldaw para iti preliminary investigation sakbay a maipila kas maysa a kaso.
Innayonna a ti rekomendasion nga insubmitir iti opisinada ket saan nga insigida a maipila kas kaso iti korte.
