LAOAG CITY – Dakkel a tulong para kenni dati a Senador Bongbong Marcos ti panangkontra dagiti mahistrado ti Korte Suprema nga agserserbi a Presidential Electoral Tribunal (PET) iti rekomendasyon ni Justice Alfredo Benjamin Caguioa nga ibasura ti electoral protest na.
Daytoy ket kalpasan ti Ireport ni Caguioa a saan a nakabawi ti butos ni Marcos iti manual recount kadagiti balota kadagiti napili a pilot provinces a Negros Oriental, Iloilo ken Camarines Sur gapo ta ad-adda pay a ngimmato ti lamang ni Vice President Leni Robredo.
Iti eksklusibo nga interview ti Bombo Radyo Laoag kenni Marcos, kunana a saan nga husto ti rekomendasyon ni Caguioa nga idismiss ti kaso ken ideklara a nangabak ni Robredo kas bise presidente.
Inpetteng na nga iti butos a 11-2 ket saan nga inawat dagiti mahistrado ti PET ti rakurak ni Caguioa ken nasken a maituloy ti kaso ken saan a kellaat a maisardeng.
Inlawlawag na nga inbilin ti PET kenkuana a mangipakita pay ti kadagiti iggem na nga ebidensya kontra iti kampo ni Robredo nga isu ita ti isagsagana na.
Kunana a masdaaw pay kadagiti rumrumwar a report seknan iti rakurak ni Caguioa a madismiss ti kaso gapo ta saan met a daytoy ti sinutor ti Korte Suprema.
Kabayatanna, nagyaman ken nagpanawagan ni Marcos iti publiko nangruna kadagiti sumupsuporta kenkuana a saan a basta mamati kadagiti saan nga opisyal a resulta mainaig iti inpila na nga eletoral protest.
Maipalagip a namindua a daras a naitantan ti pannakaiparuk-at ti resulta ti naiyuswat a manual recount iti electoral protest ni Marcos kontra kenni Robredo.
