Inyusuat ti Department of Health (DOH) – Ilocos Region ken ti lokal a gobierno ti Agoo, La Union ti “Rekorida Vaccine Campaign” tapno ad-adda a mapapigsa ti salun-at ti komunidad babaen ti panagbakuna ken panangparegta kadagiti nagannak ken mangay-aywan tapno masigurado ti kompleto a routine immunization para kadagiti annakda nga agtawen iti 5 ken agpababa.
Inpaganetget ni Regional Director Paula Paz M. Sydiongco ti kinapateg ti routine immunization kadagiti ubbing ken pinaregtana dagiti nagannak a mangbakuna kadagiti annakda tapno masigurado ti salun-at ken pagimbaganda.
Dinakamat pay ni Sydiongco ti pateg ti bakuna iti pannakaispal ti biag dagiti ubbing.
Agdagup iti 200 nga ubbing ti target representative dagiti 49 a barangay ti Agoo iti launch campaign a naangay iti Jose D. Aspiras Civic Center idi Abril 23, 2024.
Mainai iti daytoy, kinuna ni Agoo Mayor Frank Ong Sibuma nga agtultuloy ti panangsuporta ti lokal a gobierno ti Agoo kadagiti programa ti Department of Health public health programs nangruna immunization campaign activities.
Kabayatanna, ti kampania a “Rekorida Bakuna” ket maitunos iti panggep ti Department of Health a makagun-od iti 95% a sakup ti bakuna kontra kadagiti sakit a malapdan ti bakuna.
Daytoy ket babaen ti Department of Health Health Promotion Framework Strategy PA 3 – Bakuna Champion.
Daytoy ket maysa a live public announcement dagiti lokal a gobierno para ti epektibo a wagas tapno maala ti atension ti publiko nangruna kadagiti rural areas ken nasulinek a barangay.
