LAOAG CITY – “Show up or shut up.”
Daytoy ti mensahe ni Manila 6th District Representative Bienvenido “Benny” Abante Jr. ken ni Baguio City Mayor Benjamin Magalong gapu iti panagkedkedna a panagkiddaw iti panagpadispensar kadagiti agpanpanday linteg ken intultuloyna ti akusasion nga adda ti pakainagan dagiti miembro ti Kongreso kadagiti saan nga umiso a flood control projects.
Inbatad ni Abante a ti saan a panagtungpal ni Magalong ket ad-adda laeng a nagbalin nga insulto iti institusion ken agbalbalin a dakes ti imahe dagiti agpanpanday linteg a nakapokus iti panangipatungpal ti mandato kas pannakabagi dagiti umili.
Nagballaag ni Abante a ti panagsarita ni Magalong ket saan a nainkalintegan ken saan a kasapulan a pakapsuten ti talek kadagiti institusion kas ti Kamara a kalikagumna a solbaren ti anomalya kadagiti proyekto iti pananglapped ti panaglayos.
Inlawlawag ti beterano nga agpanpanday linteg nga awan ti monopolyo a nasayaat a gagem ni Mayor Magalong.
Innayon ni Abante a dagiti nasao a reckless claims ti Mayor ket makadadael iti reputasion ti 300 a miembro ti Kamara.
Kabayatanna, manamnama a rugianen ti house tri-committee tapno imbestigaran dagiti maanomalya a flood control projects.
