LAOAG CITY – Nagtalinaed ti takder ni Tingog party-list Rep. Jude Acidre nga awan ti nakita a pagsungbatan iti Independent Commission for Infrastructure (ICI) ni dati nga House Speaker Martin Romualdez kadagiti anomaliya iti flood control projects.
Daytoy ket panangkontra kadagiti akusasyon ni Navotas Rep. Toby Tiangco kontra ken ni Romualdez.
Iti maysa nga statement, inbatad ni Acidre a basar iti referral ti Independent Commission for Infrastructure iti Ombudsman, awan ti aniaman a naduktalan wenno konklusyon ti panagbasol kontra iti dati a lider ti kamara de representantes.
Maipalagip a pormalen ga inyakar ti Independent Commission for Infrastructure ti kaso iti Office of the Ombudsman para iti naun-uneg nga imbestigasyon, karaman ti affidavit ken dagiti recording ni Romualdez.
Inrakurak met dagiti abogado ni Romualdez ti panagtalek da nga agbalin nga “independent, thorough, ken objective” ti Ombudsman.
Nupay adda dagiti report a nangirekomendar ti Independent Commission for Infrastructure ken Department of Public Works and Highways ti kaso a plunder, inpetteng ti kampo ni Romualdez nga awan ti direkta a konklusyon ti guilt ti Independent Commission for Infrastructure kontra kenkuana.
Ti imbestigasyon ket namonganay kadagiti alegasyon ti “ghost” wenno saan a nalpas a flood control projects ti gobyerno.
