LAOAG CITY – Suportado ti nadagsen nga ebidensia dagiti alegasion iti impeachment case a naipila kontra ken ni Vice President Sara Duterte ket suportado ti adu a napipigsa nga ebidensia.
Daytoy ti inrakurak ni Surigao del Norte Rep. Robert Ace Barbers.
Ni Barbers ket isu ti lead chairman ti House Quad Comm lead ket nangipaay ti komento kas sungbat iti inbatad ni Duterte a saanna a pinangtaan nga ipapatay da Presidente Ferdinand Marcos Jr., First Lady Liza Araneta Marcos ken Speaker Ferdinand Martin Romualdez.
Ti nasao a pangta nga inaramid ni Duterte idi Nobiembre 2024 ket nagwaras iti online ket karaman iti Articles of Impeachment a pinirmaan dagiti 215 a kongresista ken inpila ti Kamara de Representantes iti Senado idi Mierkoles.
Inlawlawagna a rummuar ti kinapudno iti impeachment trial ni Vice President Duterte iti Senado.
Kuna ni Barbers, uray saan isuna nga abugado, iti bukudna nga opinyon ket umanay ti ebidensia tapno suportaran dagiti akusasion iti impeachment.
Inpettengna nga adda kadagiti senator-judges ti responsibilidad a tingitingen dagiti akusasion iti impeachment ken dagiti ebidensia.
Kas sungbat iti saludsod, inpalgak ni Barbers a narigat nga ilungalong nga agikkat ni Vice President Duterte tapno saanen nga aggastos ti pagilian para iti impeachment trial.
Kunana a ti na-impeach a Bise Presidente ket addaan ti karebbengan a dumalan iti due process iti Senado.
Nupay kasta, binabalaw ni Barbers ni Vice President Duterte gapu ta saan a seryoso ti impeachment nga inaprobaran ti supermajority dagiti miembro ti Kamara.
