LAOAG CITY – Nagpanawagan ni Bicol Saro Partylist Representative Brian Raymund Yamsuan iti liderato ti Philippine National Police (PNP) a rugyan dan ti mangipalawa ti training ken agtultuloy nga edukasyon kadagiti police personnel tapno masigurado a makasursurot da kadagiti reporma nga ipatungpal ti Department of Justice iti panagala kadagiti ebidensiya ken case buildup kadagiti kaso kriminal.
Inbatad ni Yamsuan a gagem ti Department iti panangipatungpal kadagiti baro a pagannurutan ket tapno masigurado nga agbalin a “winnable” dagiti kaso no naipilan iti korte.
Kuna na a magun-od laeng daytoy no sumursurot iti police operational procedures dagiti kameng ti pulisya nga agsek-secure ti crime scenes.
Gapu ta inpangaton ti Department of Justice ti standard da, rebbeng laeng a nakatutuk ti Philippine National Police iti agtultuloy nga edukasyon ken training ti nailian a pulisya.
Dinayaw ni Yamsuan ni Justice Secretary Jesus Crispin Remulla iti panangilunglungalong na kadagiti reporma iti justice system ti pagilian.
Kumpiyansa ni Yamsuan a ti baro a criminal investigation procedures ti Department of Justice ket maliklikan ti panagpila ti harassment complaints ken dagiti nakakapsot a kaso iti korte.
