LAOAG CITY – Inawat ni House Prosecutor ken Mamamayang Liberal party-list Rep. Leila de Lima ti rekomendasion nga i-dismiss ti reklamo nga impila ni Atty. Manases “Mans” Carpio kontra kadagiti sumagmamano a House Prosecutors ken agpapanday linteg.
Segun ken ni de Lima, ti reklamo ket maibilang kas maysa nga harassment suit a kalikaguma a pakigtutan dagiti agpanpanday linteg a mangububra laeng dagiti trabahoda iti baet ti impeachment trial ni Vice President Sara Duterte.
Inpetteng ni de Lima ti panangitultuloyda nga ilaban ti transparency ken accountability ken pagsungbaten ti siasinnoman nga adda pakainaiganna kadagiti anomalia iti gobierno.
Maipalagip ti panangipila ni Carpio ti reklamo kontra ken ni de Lima ken kadagiti dadduma pay nga opisial ti gobierno gapu iti maipagarup panaglabsing iti bank secrecy law, data privacy ken anti-money laundering act mainaig iti pannakaipublikar ti bank records-da.
Kabayatanna, inrekomendar met ti Quezon City Office of the City Prosecutor ti dismissal ti nasao a reklamo.
