LAOAG CITY – “Enough is enough.” Panawen tapno agsungbat dagiti kurakot.” Daytoy ti inpetteng ni Mamamayang Liberal partylist Rep. Leila de Lima.
Inaramid ni De Lima ti rakurak iti naisayangkat a tignay protesta ita nga aldaw, Septiembre 21, 2025.
Karaman ti agpanpanday linteg ti nangidaulo iti panangbabalaw kadagiti maipagarup a maanomalya ken korapsion kadagiti proyekto ti gobierno.
Kas House Deputy Minority Leader, naiget a binabalaw ni De Lima dagiti agpanpanday linteg nga arig saanda nga ilablaban ti interes ti taumbayan.
Binabalaw pay ni De Lima dagiti opisial a mabenbenepisiaran kadagiti “kickback” a maipagarup a mangituntunda ti panagrigat kadagiti Pilipino nangruna iti panawen ti panaglayos.
Kas solusion, nagpanawagan ni De Lima iti Kongreso a mapagbalin a linteg ti “Independent Commission Against Infrastructure Corruption” tapno masolbar ti seryoso a kumarkaro a korapsion ditoy pagilian.
Inallukoy ni De Lima ni Presidente Ferdinand Marcos Jr. nga i-certify kas urgent ti House Bill No. 4453 a mangitantandudo ti nasao a komision.
