LAOAG CITY – Inadmitir ni Ilocos Norte 1st District Rep. Ria Fariñas nga adda dagiti nakigtot iti panag-substitute iti kina-gobernador ditoy probinsya ti ama na a ni dati House Majority Floor Leader Rudy Fariñas gapo ta adda idin ti impormasyon nga agretiron iti pulitika.
Segun kenni Cong. Fariñas, makita met ti ama na ti panagrigrigat dagiti kaprobinsyaan nangruna ita a pandemya ken kalikagom na ti tumulong nga isu ti rason no apay nga agpaidasig kas gobernador.
Kunana pay nga isaksakit isuna ti ama na gapo ta ti kalikagom da kuma ket kapya iti nagbaetan da iti pamilya Marcos.
Inbatad na nga arig na saan a kayat ti pamilya Marcos ti makikapya kadakuada gapo ta adda pay ti inlaban dagitoy kenkuana kas kina-kongresista iti ummuna a distrito ditoy probinsya.
Mainaig iti daytoy, saanen a baro para kenni Gov. Matthew Marcos Manotoc ti panagsubstitute ni dati House Majority Floor Leader Rudy Fariñas kas kina-gobernador a nangitunda ti panaglaban da para iti Eleksyon 2022.
Segun kenni Manotoc, kastoy manen ti napasamak idi 2019 ken ti rumbeng a makita ket no pudno ni Fariñas iti panagkandidato na.
Inpetteng na a saan met a daytoy ti tuttutukan na iti agdama gapo ta ti napateg ket ti trabaho na kas mangidaulo iti probinsya.
Inbatad na a masapol a ti pakakumikoman na ket ti panangtulong na kadagiti residente ti probinsya ken kalikagom na ita ti in-inot a panangisubli iti pukaw ti ekonomiya ken panangipaay ti nagduduma a klase ti trabaho.
Innayon ni Manotoc a dagiti met laeng residente ti Ilocos Norte ti makaibaga no siasinno ti makabael a mangibaklay iti intero a probinsya.
