LAOAG CITY – Nagpanawagan ni House Deputy Minority Leader at ACT Teachers Party-list Rep. Antonio Tinio ti naiget nga imbestigasyon kadagiti maipagarop nga anomalya iti budget ti Department of Public Works and Highways kalpasan a rimuar iti impormasyon a maikonkonektar kada Vice President Sara Duterte, Rep. Paolo “Pulong” Duterte, ken Atty. Harry Roque kadagiti budget insertion idi 2020.
Segun ken ni Tinio, saan a mabalin nga agindadalos ni Vice President Duterte gapu ta adda met dagiti proyekto nga inserrek na iti Department of Public Works and Highways idi mayor paylaeng daytoy idiay Davao City.
Dinakamat na pay ti maipagarop a ₱51 bilyon nga alokasyon ken ni Pulong Duterte nga immunan a kinumpirmaran ti pimmusay a ni dati a Department of Public Works and Highways Undersecretary Catalina Cabral.
Innayon ni Tinio, nga uray ti sumagmamano a dati nga opisyal ti Malakanyang kas kada Roque ken Bong Go ket maipagarop a nairanus idi panawen ti Duterte administration.
Inpetteng ti agpanpanday linteg a maipagarop a nangrugi ti nalawa a korapsyon iti budget ti Department of Public Works and Highways sipud idi 2016 agingga iti 2022, isut gapuna a sakupen ti sibubukel a panawen ken pagsungbaten dagiti karaman iti anomalya.
