LAOAG CITY – Naipatuluden ti report inspection ti Gabu Watch Tower ditoy siudad ti Laoag iti National Commission for Culture and the Arts wenno NCCA.
Daytoy ti inpakaammo ni Atty. Charito Malicad, mangidadaulo ti City Tourism Office ditoy siudad ti Laoag.
Segun ken ni Atty. Malicad a maiyur-uray laengen ti sungbat iti National Commission for Culture and the Arts para iti sumaruno nga addang nga aramiden dagitoy.
Inlawlawagna nga uray adda ti pundo a pangtarimaan para iti daytoy ket saan a mabalin a rugian gapu ta kasapulan ti approval ken assistance manipud iti National Commission for Culture and the Arts.
Maipalagip a nadadael ti sumagmamano a paset ti Gabu Watch Tower gapu iti napasamak a ginggined idi bulan ti Enero ita a tawen.
Kabayatanna, ti Gabu Watch Tower ket naipasdek idi Spanish colonial period ken maus-usar nga outpost para kadagiti tattao tapno mapakadaanda no adda dagiti pirata.
