LAOAG CITY – Inpasigurado ni Gob. Matthew Marcos Manotoc a kada bigat ti Lunes ket adda agbalin nga announcements wenno rakurak dagiti nagduduma a Departamento iti Kapitolio Probinsial a mabalin a maammoan dagiti empleado.
Segun kenkuana, tunggal lawas ket sabali-sabali ti ag-host iti flag raising ceremony nga atendaran dagiti amin nga empleado pakairamanan dagiti opisial ti probinsia.
Nupay kasta, inlawlawag ni Gob. Manotoc nga uray saan a ti ag-host a Departamento wenno National Agencies ket mabalinda ti agpakaammo kadagiti programa a nasken a maammoan ti publiko.
Kunana a mabalin pay nga iwaragawag dagiti dadakkel a damdamag iti probinsia ken iti pagilian.
