LAOAG CITY – Naragsakan ni dati nga Health Secretary ken agdama a Deputy Majority Leader ken Iloilo Representative Janette Garin iti nagbalin a desisyon ti Department of Justice (DOJ) nga i-withdraw dagiti kaso iti korte mainaig iti kontrobersiyal nga isyu seknan iti dengvaxia.
Iti maysa nga interview ken ni Garin, kuna na a maragsakan da iti nasao a desisyon ken mangnamnama a mairaman koma pay dagiti scientist wenno health experts kangrunaan a naapektaran iti nasao a kontrobersyal.
Nupay kasta, kuna ni Garin nga agtultuloy paylaeng ti pannakilaban da gapu ta adda pay dagiti dadduma a nakapenpen a kaso.
Inpetteng ni Garin a nasakit a panunuten a napulitika ti salun-at ken nairamraman ti ado nga health experts.
Inpakaammo ni Garin nga adda ti 158 criminal cases, 32 civil cases ti naipila kontra kenkuana ken ti dua ditoy ket pending iti agdama iti Sandiganbayan partikular iti Office of the Ombudsman ken agpapada ti context dagiti reklamo.
Segun iti Kongresista, walo a kaso ti dagus a naibusara gapu ta napaneknekan a saan a nabakunaan ti dengvaxia dagiti ubbing.
Nagpanawagan met ti agpanpanday linteg nga isardengen ti panangiliklik iti pudno nga isyu ken saan a pangnamnamaen dagiti nagannak dagiti ubbing nga adda ti maawat da a claims.
