LAOAG CITY – Opisyalen nga innominar ti Republican Party kas Presidente ni dati nga United States President Donald Trump iti 2024 US Presidential Election.
Kagiddan daytoy ti panangpili na ken ni Ohio US Senator J.D. Vance kas Vice Presidential running mate-na.
Ti panangiwaragawag ket naangay iti selebrasyon ti National Convention idiay Milwaukee, no sadinno a nangrugi daytoy dua nga aldaw kalpasan ti assassination attempt ken ni Trump idiay Pennsylvania kabayatan ti rally.
Segun ken Trump, pormalna nga awaten ti nominasion ti partido iti maangay a prime-time speech-na inton sumarsaruno nga aldaw.
Maipalagip a ni Vance, ket dati a kritiko ni Trump idi 2016, sipud idin ket nagbalin isunan kas maysa kadagiti mapagtalkan ken napudno a defender ti dati a presidente.
Mainaig iti daytoy, kalpasan ti anunsio ni Trump, ket nagturong ni Vance kadwana ti asawa na a ni Usha iti convention floor ket ditoy nga inpakitana ti panangabrasa na iti desisiyon ni Trump ken manamnama ti panagbitlana inton Mierkoles, aldaw idiay America.
