LAOAG CITY – Naalarma dagiti sumagmamano a residente ti Brgy. 8, San Agustin iti ili ti Paoay.
Segun ken ni Senior Fire Officer 1 Glenn Mcnil ti Bureau of Fire Protection iti nasao nga ili, daytoy ket kalpasan iti napasamak a grassfire idi rabii agarup agalas nuebe idi rabii.
Inbatadna nga adda naawatda a report manipod iti biang ti Philippine National Police rason a dagus dagitoy a napan nagresponde tapno masebseban nga insigida ti apoy.
Kunana a nagamak dagiti residente nga agnanaed iti asideg iti nakapasamakan ti uram amangan no dumanon ti apoy kadagiti pagtaengan nangruna ket napigsa ti pul-oy ti angin kadayta a gundaway a nangitunda ti alisto a panagramram ti apoy.
Inlawlawagna nga alisto pay a dimmakkel ti apoy gapu ta narway a nagango a bulbulong dagiti adda iti kapanagan rason a nabengbeng ti asok a makita iti tangatang.
Inpakaammona a mapattapattang nga umabot ti 300 square meters ti kalawa ti naapektaran ti nasao a grassfire no sadino dandani pay a nairamraman a nauram dagiti sumagmamano a taraken a manok.
Inbagana a maysa a fire truck ti napan nagresponde iti uram ken nasebseban ti apoy iti uneg ti uppat a pulo ket lima a minutos sakbay a naideklara a fireout.
Innayonna a basar iti imbestigasion ti BFP Paoay ket dagiti nagango a bulbulong a nabaybay-an a pinuuran dagiti saan pay a nabigbig a residente ti rumrummuar a rason ti pannakaitunda ti napasamak a grassfire.
Kabayatanna, iti daytoy nga aldaw ket agsublida iti lugar a nakapasamakan ti uram tapno agimbestigar pakaseknan iti daytoy a banag.
