LAOAG CITY – Inpasingked ni Barangay Chairman Lourdes Estrada, iti Brgy. Pancian, iti ili ti Pagudpud a manarimaan iti panagtrace da kadagiti residente a napan nagrehistro para iti panagbotos iti ili ti Adams.
Kuna na nga addan dagiti report a naaw-awatan nan mainaig iti nasao nga impormasyon.
Segun kenni Estrada, nasken kuma met a nakita dagiti maseknan iti ili ti Adams ti panagrehistro dagiti tattao nga agnanaed iti Brgy. Pancian.
Inbatad na a makikoordinar da iti Comelec tapno maamuan dagiti nagan dagiti napan nagparehistro iti nasao nga ili.
Babaen iti daytoy ket tapno makasarita da dagiti maseknan mainaig iti gagem da nga agbotos iti sabali a lugar.
Saan a masinunuo ni Estrada ti kaudian a bilang dagiti napan nagparehistro ngem iti inisyal nga impormasyon daytoy ket innem a tattao.
Innayon na a maik-ikkan ti ayuda dagiti residente iti Brgy. Pancian nangruna dagiti saan nga agbotbotos iti barangay ken nakarehistro iti sabali a lugar.
Immunan a naipadanun iti Bombo Radyo Laoag nga adda ti maipagarup nga opisyal a mangal-allukoy kadagiti residente iti nasao a barangay nga agrehistro iti ili ti Adams ngem saan a masungbatan ni Kapitana Estrada.
Inbunannag na nga iti kallabes ket dda ti maysa a miembro iti Sangguniang Bayan iti ili ti Adams nga agnanaed iti Brgy. Pancian ngem iti agdaman ket residensya daytoy iti nasao nga ili.
