LAOAG CITY – Naaprobaran iti maikadua ken maudi a pannakaibasana ti maysa a resolusion a gagem a maikabil iti pagsasao nga Ilokano dagiti amin a public signages ditoy siudad ti Laoag.
Daytoy ket gakat a pinutar dagiti junior officials nga indauluan ni JCO – Athena Daniella Zephyr a counterpart ni Konsehal Donald Nicolas ti Chairman ti Committee on Laws.
Inbatad ni Zephyr a napintas daytoy a gakat gapu ta malaksid iti al-alisto a pannakaawat dagiti residente ditoy siudad ket maitandudo pay ti pagsasao nga Ilokano.
Inlawlawagna a rumbeng a maikabil ti iloco translation gapu ta daytoy ket paset ti kultura ken tradision tapno maipamatmat kadagiti agtutubo ti iloco translation dagiti public signages kas kadagiti no entry, stop, entrance, exit ken no right and left turn.
Kunana a saan a maikkat dagiti translation ti ingles dagitoy a signages gapu ta mainayon laeng ti iloco translation.
Mainaig iti daytoy, inpakaammo ni Konsehal Nicolas a napintas daytoy gapu ta addan dagiti kaparanget a pagilian kas iti Taiwan, China ken Korea a mangipatpatungpal iti daytoy.
Kabayatanna, naragsakan ni Vice Mayor Rey Carlos Fariñas gapu ta daytoy a resolusion ket kabukbukudan nga inaramid dagiti junior officials ken awan ti nangtulong kadakuada a kameng ti konseho.
Maipalagip a ti termino dagiti junior officials ket nangrugi idi Pebrero 16 ken agngudo ita nga aldaw Pebrero 19 kas paset iti pannakarambak ti Pamulinawen festival.
