LAOAG CITY – Naipasa iti umuna a pannakaibasana ti Draft City Resolution No. SP 2025-022 wenno ti maysa a resolusion a mangkidkiddaw a mausar ti siam a milyon a pisos iti City Disaster Risk Reduction and Management Office.
Daytoy ket manipud iti saan a nagastos a pundo idi tawen 2019, 2021 ken 2023 babaen ti Local Disaster Risk Reduction and Management Fund.
Segun ken ni Sangguniang Panlungsod Member Jeff Fariñas, daytoy ket quick respond para iti pannakagatang kadagiti nagduduma a suplay, kagamitan ken dadduma pay para iti baro a naipasdek nga Emergency Operations Center iti City Disaster Risk Reduction and Management Office Building.
Inbatadna a mamati daytoy nga adu pay ti kurang iti nasao a pasilidad isu nga ita a nasapa pay ket masapol a makita dagus dagiti kangrunaan a kasapulan tapno nasapa a makakiddaw ti tulong kadagiti maseknan a pangopisinaan.
Kunana a napateg ti napintas a koordinasion para iti alisto a panagresponde kadagiti umili nga agkidkiddaw ti tulong.
Innayonna ti agtultuloy a pannakapasayaat ti abiliad iti pannakaiwayat ti search and rescue operation.
