LAOAG CITY – Inaprobaran ti Sangguniang Bayan ti resolusion para iti Temporary Closure Order iti maysa a poultry farm iti Barangay Naglicuan iti ili ti Pasuquin.
Segun ken ni Sangguniang Bayan Member Dante Viernes, Chairman ti Committee on Health, daytoy ket kalpasan a naruay a residente dagiti agrekreklamo gapu iti kinaadu a ngilaw ti agturturong kadagiti pagtaenganda manipud iti nasao a poultry farm.
Inbatadna a personal a nagturongda iti poultry farm ket ditoy a naimatanganda ti kinaadu dagiti ngilaw a dakkel a parikot kadagiti residente.
Inlawlawagna a masapul nga agtungpal ti akinkukua ti poultry farm kadagiti amin a naiyetnag a pagannurotan tapno agsublinto met laeng ti operasion daytoy.
Kunana nga ita nga aldaw ket maiyuli daytoy inaprobaranda a resolusion iti opisina ni Mayor Robert Aguinaldo iti ili ti Pasuquin tapno pirmaan ken naan-anay a maipatungpal.
Innayonna nga iti agdama ket adda pay laeng dagiti manok iti poultry farm ngem apaman a maipaibus daytoy ket saanen a maipalubos pay a makargaan manen agingga a saan a masolbar ti reklamo.
Maipalagip a kalikagum ni Mrs. Nelly Ridera, maysa kadagiti residente iti nadakamat a barangay a maipasardeng ti operasion ti poultry farm gapu iti kinaadu ti ngilaw a dumandanon kadagiti pagtaengan a mangitunda ti risgo iti salun-atda.
Immuna iti daytoy, inpakaammo ni Barangay Chairman Oliver Valite ti Barangay Naglicuan iti ili ti Pasuquin nga inaramidda aminen dagiti rumbeng a maaramid tapno mapaserraan ti nasao a poultry farm.
Kabayatanna, ikarkarigatan ti Bombo Radyo Laoag News Team nga alaen ti takder ti maseknan nga akinkukua ti poultry farm maipanggep iti daytoy a banag.
