LAOAG CITY – Saan a nagpangadua ni Mr. Leonel Nicolas iti Barangay 13 ditoy ciudad ti Laoag a nangisubli iti napidot na a bag a naglaon ti agarop 300 a ribo a pisos.
Segun kenni Nicolas, bayat nga adda iti parking area iti maysa a kamposanto ditoy ciudad ket adda ti napidot na a bag ngem saan na a dagus a linukatan daytoy imbes ket naguray da pay laeng iti agarop 10 a minutos.
Inbatad na a gapo ta awan ti nauray da ket linukatan da ti nasao a bag ken nakigtot da gapo ta rinibribo ti linaon daytoy rason a nagdesisyon da iti anak na nga ipaima ti PNP.
Naamoan a ti linaon ti bag ket kwarta, cellphones ken nagduduma a napapateg a dokumento ken personal a kagamitan ti babai.
Inlawlawag na a gapo ta ti cellphone iti agtagikua a ni Mrs. Elsie Domingo ket adda met laeng iti uneg ti bag, tinawagan ti PNP ti kapitan iti residensya ti babai a nakapukaw tapno ipakammo daytoy.
Mainaig iti daytoy, kuna ni Nicolas a saan na a pulos a napanunot a tagikwaen ti kwarta gapo ta patyen na a dakkel a banag daytoy iti agtagikua ken basol iti Diyos no saan na nga isubli.
Dinakamat na nga adda ti ited kuma ti agtagikua iti kwarta a gunguna iti panangisubli na iti dakkel a kantidad ngem saan na nga inawat gapo ta inbaga na a para laengen iti pamilya ti babai.
Mangnamnama ni Nicolas nga agbalin nga ehemplo iti publiko ti inaramid na ken mapanunot a saan laeng a kwarta ti napateg no diket iti panagtitinnulong.
Kabayatanna, napalaos met ti panagyaman ni Mrs. Domingo gapo ta naisubli ti kwarta gapo ta daytoy ket koleksyon ket pagbayad na.
Inpalgak na nga idi nadlaw na a napukaw ti bag na ket saan na nga ammo ti aramiden nan gapo iti nerbyos.
Kunana nga agserbi a leksyon kenkuana daytoy a napasamak.
