LAOAG CITY – Boluntaryo a napan simmuko iti Philippine National Police iti ili ti Pagudpud kalpasan a naamoan na nga adda ti naiparuk-at a warrant of arrest kontra kenkuana.
Binigbig ni Police Major Carlo Abing, ti chief of police iti ili ti Pagudpud, ti akusado a ni Dessie Ortega, agtawen ti 55, naasawaan, retirado a pulis, taga Barangay Catbangen, San Fernando, La Union ngem agdama nga agnanaed iti Poblacion 2 iti nasao nga ili.
Segun kenni Abing, ti warrant of arrest a napetsaan paylaeng ti Agosto 5, 1999 ket inparuk-at ni Hon. Melvin Calvan iti Municipal Trial Court iti ili ti Bangui gapu iti kaso ti akusado a less serious physical injuries.
Saan a ninamnama ti akusado nga adda paylaeng ti nasao a kaso a namonganay iti panagriri ken panagkabil da iti karruba na idi aktibo paylaeng a pulis.
Dagus metlaeng a nawaya-wayaan ti akusado kalpasan a nakapagpiyansa ti 2,500 a pisos.
