LAOAG CITY – Boluntario nga insuko ti maysa a retirado a seaman ti paltogna nga expired ti lisensiana iti ili ti Bacarra.
Segun ken ni Police Major Sheryll Guzman, ti Hepe ti Philippine National Police iti nasao nga ili, daytoy ket babaen pay laeng ti naigetda nga isaysayangkat nga Oplan Katok.
Inbatadna a ditoy a naideposito iti kuerpo ti pulisia ti calibre 45 a paltog, dua a bala ken dua a magazine ti maseknan no sadino idi napan a tawen pay nga expired daytoy.
Kunana nga adda ti listaanda kadagiti addaan ti iggemna a paltog isu nga ammoda no asino ti nasken a pagturunganda iti pannakaipatungpal ti Oplan Katok.
Inlawlawagna a temporario pay laeng a maikabil dagiti naideposito a paltog iti opisinada para iti safe keeping dagitoy.
Nupay kasta, inpalgakna nga apaman nga adda ti maiprisentarda nga umiso ken umdas a dokumento a mangipaneknek ti pannakaipalubosda nga agaramat ti paltog ken nawaya a maisubli dagitoy a paltog kadakuada.
Kabayatanna, ginutigotna dagiti amin a gun holders iti nasao nga ili nga ideposito dagiti paltogda nga expired ti lisensiada tapno maliklikan dagitoy a mapatawan ti maiyannatop a pannusa.
