LAOAG CITY – Inbatad ni Department of Agriculture Secretary Francisco Tiu Laurel Jr. a nagkari dagiti rice importers nga ibasbassit da ti angkaten da a bagas intono Marso ken Abril ita a tawen.
Segun ken ni Tiu Laurel ti naipagagangay nga ang-angkaten dagiti rice imports ket adda iti average nga agarop 400,000 a metriko tonelada iti kada bolan.
Nupay kasta, kuna ti opisyal nga inpasingked dagiti importers a limitaran da laeng ti 150,000 a metriko tonelada ti angkaten da para iti panawen ti panagapit dagiti lokal a mannalon.
Innayon ti sekretaryo a saan a naimandar kadagiti rice importers ti nasao nga addang da no di ket boluntaryo da daytoy nga aramiden para iti pagsayaatan dagiti mannalon ditoy pagilian.
Maipalagip a naibabawi ti ban iti rice importation idi Enero ita a tawen.
Kabayatanna, kuna ni Tiu Laurel Jr, a manamnama a bumaba ti presyo ti bagas iti panawen ti panagapit.
