LAOAG CITY – Inpakaammu ti United States Department of Agriculture (USDA), a mabalin a dumanon iti 527.62 milion metric tons ti dagup a produksion ti bagas iti sangalubongan ita a tawen.
Nangatngato bassit daytoy a no idilig iti 527.60 a milion a Metric Tons a napataud iti sangalubongan idi napan a tawen.
Ti iyaadu, segun iti United States Department of Agriculture, ket gapu met iti ad-adu a talon dagiti Indian a namulaan iti pagay.
Iti agdama, dagiti kangrunaan a pagilian nga addaan iti nangato a produksion ti bagas ket ti China, India, Bangladesh, ken Indonesia, ken Vietnam.
Maibasar iti rekord, nasurok a 210 milion MT ti produksion ti pagay idiay China, ken dandani 200 milion MT ti aggapu iti India.
Kabayatanna, manamnama a dumanon iti 12.7 million MT ti produksion ti bagas ditoy Pilipinas ita a tawen.
