LAOAG CITY – Maisagsaganan ti maiyannatop a kaso kontra kenni Jeramy Magaoay, agtawen ti 27 ken residente iti Brgy. 35 Pipias iti ili ti Bacarra kalpasan ti naiyuswat a search operation iti panagtaengan da.
Daytoy ket kalpasan a nagpositibo ti operasyon gapu ta nakarekobre dagiti otoridad ti dua a maipagarup a rifle grenade, ken maysa a magasin nga addaan ti pito a bala ti kalibre 45.
Segun kenni Magaoay, patyen na a naimula dagiti banag a narekobre dagiti otoridad iti uneg ti pagtaengan na.
Inlawlawag na nga itay nakaawid da iti pagtaengan da manipud iti simbaan a nagatendaran da ti umuna a misa de gallo ket kelaat a simrek dagiti saan a nakauniporme nga otoridad bayat ti panagsagsagana da a mammigat.
Kuna na a simrek dagiti otoridad iti sango ken likod ti pagtaengan da ken maipagarup a nagtutok da pay iti paltog.Inpetteng ni Magaoay nga awan ti ikikotan na nga anyaman a paltog.
Inadmitir na nga adda ti nakairamanan na mainaig iti pammaltog idi tawen 2017 ngem nadismiss ti kaso a naipila kontra kenkuana.
Naamuan ti Bombo Radyo manipud iti PNP a ti napasamak a pammaltog iti kallabes ket inpurwak ni Magaoay ti paltog a nausar iti kataltalonan ngem narekobre met laeng dagiti otoridad.
Mainaig iti daytoy, kinumpirmaran ni Barangay Kagawad Yolanda Bagcal babaen ti datus ti barangay a nagpaputok ni Magaoay ti paltog iti ili ti Pasuquin nga isu ti poon ti pannakatiliw na idi tawen 2017 ngem daytoy ket nagbalbaliwen.
Immuna iti daytoy, sakbay ti panagsukisok dagiti otoridad ket nailawlawag a naimbag ti linaon ti search warrant no sadino a kalikagum da a sapulen ti kalibre 45 a paltog agraman dagiti bala na.
