LAOAG CITY – Inbatad ni United Nations (UN) humanitarian chief Tom Fletcher nga umabot iti agarop 14,000 a maladaga ti possible a pumusay iti Gaza iti sumaruno nga 48 nga oras no awan ti dumanon nga ad-ado a tulong para kadakuada.
Immunan nga inrakurak ti Israel a nagngudon ti 11 a lawas a panangsaed da kadagiti tulong a maiserrek iti Gaza.
Nupay kasta, kuna ti Israel a limitado laeng ti ipalubos da a maiserrek a tulong kangrunaan na ti taraon para kadagiti residente iti Gaza.
Mainaig iti daytoy, inbatad ni Fletcher a lima laeng a truck ti nakastrek iti Gaza ken saan pay a nabunungan amin ti taraon dagiti tattao iti nadakamat a lugar.
Inpalgak ni Fletcher a kayatna nga isalakan ti agarop 14 a ribo a maladaga iti las-od ti 48 nga oras.
