LAOAG CITY – Inbilin dagiti otoridad iti France ti pannakaibakwit amin dagiti agnaed iti Cap Ferret peninsula iti south-west coast, no sadinno a ginasuten a tattao dagiti pimmanaw iti lugar babaen ti panaglugan da ti bangka.
Rinibo a tattao ti immunan a naibakwit manipod iti tourism destination iti laud ti Bordeaux, kabayatan ti agtultuloy a pananglaban dagiti bombero iti nalawa a wildfires iti Gironde region.
Nangrugi ti wildfires idi martes no sadinno nga umaboten iti 10 ribo nga ektarya wenno agarop 25,000 acres ti nadadael.
Kabayatanna, indeklarar met ti gobierno ti Spain ti national emergency gapu iti pannakaapektar ti wildfires iti sumagmamano a lugar iti asideg ti Madrid.
Ibilang ni Isabel Díaz Ayuso, ti presidente ti community of Madrid, a daytoyen ti kagrabean nga uram a napasamak iti pakasaritaan ti rehiyon.
Binalakadan met ni Spanish Prime Minister Pedro Sánchez dagiti umili para iti naan-anay a panagan-agannad da.
