Rinibo a tattao ti nakipaset iti tignay-protesta iti Edinburgh idiay Scotland tapno kontraen ti plano a pannakaipatakder dagiti dadakkel nga AI data centres.
Iggem dagiti demonstrador dagiti placards a nakaisuratan ti panangkontra da iti nasao nga addang, no sadinno a naka-costume pay dagitoy a nagtitipon iti tuktuk ti Royal Mile sakbay a nagmartsa da a nagturong iti Scottish Parliament.
Naiwayat ti tignay protesta kalpasan ti debate maipanggep ti agbalin nga epekto iti aglawlaw dagiti maipatakder a dadakkel a data centers.
Manamnama nga ipublikar ti gobierno ti Scotland dagiti baro a pagannurutan mainaig iti pannakaipatakder dagiti dat centres no sadinno a nairakurak nga adda ti mabukbukel nga istratehiya tapno mapalawa ti benepisyo para iti publiko.
Kaadoan kadagiti nakipaset iti tignay-protesta ket inpeksa da ti panangkontra da iti pannakaipatakder dagiti data centers kadagiti sumagmamano a komunidad a pakairamanan iti Cockenzie, East Lothian, ken Larbert, Falkirk.
