LAOAG CITY – Rinibo nga Iranians ti nagtitipon kadagiti kalsada iti Tabriz tapno ipakita da ti panagladladingit da iti ipupusay ni President Ebrahim Raisi kalpasan a nagswek ti nagluganan ti grupo na nga helicopter.
Sinursurot dagiti rinibo nga Iranians ti funeral procession iti intero a ciudad iti north-west Iran bayat ti panagiwag-wagayway da ti bandera ti pagilian ken ti ladawan ti presidente.
Manipod iti Tabriz ket maikabil ti bangkay ni Raisi iti Qom a maikonsiderar a maikadwa a sagrado a ciudad iti Iran, sumaruno iti Mashad, ken kalpasan iti daytoy ket maipan iti ciudad ti Tehran a kabisera ti nasao a pagilian.
Ti processions ket maiyuswat iti ciudad ti Tehran ita a bigat ken idaulwan ni Iran Supreme Leader Ayatollah Ali Khamenei ti panagkararag ken ti farewell ceremony.
Maitabon ti bangkay ni Raisi iti Mashhad a nakaiyanakan na intono huwebes, Mayo 23 ita a tawen.
Maipalagip a nagswek ti helicopter a nagluganan ni Raisi ken pito a sabsabali pay bayat ti panagdaldalyasat da iti kabanbantayan a paset ti Iran.
Iti agdama ket nadutukan ni Vice-President Mohammad Mokhber nga agasumir kadagiti interim duties.
Maiyuswat ti presidential elections idiay Iran intono Hunyo 28 ita a tawen.
Kabayatanna, iti baet a nakaad-ado dagiti Iranians nga agladladingit iti pannakatay ni Presidente Raisi ket adda da met latta dagiti umili iti Iran nga agselselebrar gapu iti napasamak.
