LAOAG CITY – Naiget a sagsaganan ti gobierno ti mapaspasangasangan a super El Niño no sadinno a mabalin a mapasaran ti nakaro a tikag, pudot, ken pannakadadael dagiti sumagmamano a sektor nga agpaot agingga Hunio.
Segun ken ni Engr. Cynthia Iglesia, ti senior weather specialist ken chief meteorological officer ti Philippine Atmospheric, Geophysical and Astronomical Services Administration (PAGASA) Laoag Complex a naiget a sagsaganaan ti gobierno ti mapaspasangasangan a super El Niño.
Pakairamanan kadagitoy ti panagplano dagiti sumagmamano nga addang kangruaan ti agbalin nga epektona iti nagduduma a sektor kas ti benneg ti agrikultura.
Inlawlawagna nga agpaot agingga Hunio ti super El Niño ken marikna iti umuna a gudwa ti tawen 2027 no sadinno a kunana nga agbalin a problema no maiyalud-od ti kinapaot ti dry season ken maitantan ti panagrugi ti panagtutudo.
Kunana pay a nakaro ti mapasaran a pudot dagiti umili gapo ta posible nga umabot ti above average ti heat index iti pagilian.
Iti agdama, kunana nga adda pay laeng dagiti mapasaran a panagtudo iti probinsia gapu iti Localized Thunderstorms ken addaan pay laeng yellow warning signal agingga iti bulan ti October ken mangrugi ti normal a panatudona iti bulan ti Disiembre.
Mainaig iti daytoy, kunana a kasapulan a rugianen ti agurnong ti danom nangruna ta mabalin nga agkisang ti danom gapu iti tikag tapno sisasagana dagiti umili ken saanda a marigatan inton panagtitikag.
Kabayatanna, nagpannawagan daytoy kadagiti umili a liklikan ti panagsayang ken agaramid kadagiti wagas tapno makainot ti danom.
