LAOAG CITY – Naguummong dagiti muslim leaders ken community members iti Blue Mosque iti Barangay Maharlika idiay Taguig City ita nga Eid’l Fitr wenno opisial nga aldaw a panagngudo ti Ramadan ita nga aldaw.
Rinugian daytoy ti morning prayer ken naggigiddan dagitoy a nagkararag ken ni Allah.
Inbatad ni Faizal Jalilul Absari, Administrator ti Blue Mosque and Cultural Center, adda ti 10,000 wenno nasursurok pay a Muslim ti nagturong iti Blue Mosque.
Kunana nga agarup alas-6:45 ket nangrugi ti panagkararag a senyales iti panaglippas ti Ramadan.
Naginnarakup, nagkinnablaaw ken nagpinnakawan ti tunggal maysa, senyales daytoy iti panagngudo ti panagayuno isut gapuna a mabalin dagitoyen a mangan.
Kabayatanna, naisayangkat dagiti nagduduma nga aktibidad nga adda ti pakainaiganna iti panaglippas ti Ramadan.
