LAOAG CITY – Nagprotesta ti rinibribu a tattao idiay Denmark ken Greenland tapno kontraen ti kalikagum ni United States President Donald Trump a gatangen ti Greenland idiay Denmark.
Iti Copenhagen, nagmartsa dagiti demonstrador a nagturong iti United States embassy kagiddan ti panangipukkawda ti “Greenland is not for sale” ken adda dagiti intugotda a banner a “No means No” ken “Hands off Greenland” pakairamanan ti nalabbaga ken puraw a bandera ti Greenland.
Adda dagiti sumagmamano a nagsuot ti nalabbaga a baseball caps a kaarngi ti “Make America Great Again” ni Trump ngem adda ti nakasurat a “Make America Go Away.”
Mapattapatta a 20 a ribu a tattao ti nagatendar iti protesta iti Copenhagen a katukad ti populasion ti kabisera ti Greenland a Nuuk idinto a naiwayat dagiti basbassit a bilang dagiti nagprotesta kadagiti dadduma a paset ti Denmark.
Iti Nuuk, ginasgasut a demonstrador pakairamanan ni Prime Minister Jens-Frederik Nielsen ti nagmartsa a nagturong iti United States consulate ken iggem dagiti bandera ken banner.
Maipalagip nga inrakurak ni Trump a napateg ti Greenland iti seguridad ti Estados Unidos gapu iti estratehiko a lokasion ken baknang iti mineral daytoy ken saanna nga inwalin ti posibilidad ti panagusar ti military force tapno matagikua daytoy.
Nangitunda daytoy ti diplomatic crisis iti nagbaetan ti Estados Unidos ken Denmark ti nagbalin a rakurak ni Trump no sadinno a kinondenar ti North Atlantic Treaty Organization.
Naammoan a ti Greenland ket addaan ti populasion a 57 a ribu ken addaan ti dakkel nga autonomy sipod pay idi 1979 ngem nagtalinaed nga adda iti babaen ti kontrol ti Denmark maipapan iti defense ken foreign policy.
Kabayatanna, sumurok-kumurang a 17 a ribu a Greenlanders ti agnanaed idiay Denmark ken dagiti amin a lima a partido iti Greenland parliament ket pabor a maaddaan ti panagwaywayas iti masangoanan ngem ad-adda a pilienda pay nga agtalinaed iti Denmark imbes a makikappeng idiay Amerika.
