LAOAG CITY – Agkidkiddaw dagiti rinibu nga Argentines ti hustisia ken nangiwayat ti tignay protesta kontra iti naranggas a panangpapatay kadagiti agtutubo a babbai.
Daytoy ket kalpasan a na-torture ken napapatay iti krimen idiay Argentina ti agtawen ti 15 a ni Lara Gutierrez pakairamanan da Morena Verdi ken Brenda del Castillo nga agpada nga agtawen ti 20 a nai-livestreamed iti social media.
Mamati ti kapulisan a drug-trafficking gang ti adda iti likudan ti insidente ken naiballaag daytoy a pasamak kadagiti umili iti nasao a pagilian.
Inbatad ni National Security Minister Patricia Bullrich, adda ti lima a suspek ti naarestarda, tallo a lallaki ken dua a babbai ngem ti agtawen ti 20 a lalaki a Peruvian a mapapati a lider ti grupo ket nakalibas ken agtultuloy a birbiruken dagiti otoridad.
Segun kadagiti imbestigador, naallukoy dagiti biktima a naglugan iti van a maipagarup a nagturong iti maysa a pasken.
Nupay kasta, inpetteng dagiti otoridad a daytoy ket kas paset ti plano tapno dusaen dagiti biktima gapu iti panaglabsingda iti gang code.
Inlawlawag ni Javier Alonso, Security Minister iti Buenos Aires province a maysa kadagiti akusado ti nangipakita ti video ti insidente a manarimaan pay a maim-imbestigaran no sadinno a nangngeg ti gang leader a dinakamatna “a kastoy ti mapasamak kadagiti agtakaw ti droga kaniak.”
Nangiruar metten dagiti otoridad ti ladawan a maipagarup a Peruvian mastermind iti krimen a mangnamnamada nga adda ti makabigbig iti daytoy.
Naammoan a ti bagi dagiti tallo a biktima ket nabirukan a naikali iti maysa a property iti southern suburb ti Buenos Aires, lima nga aldaw kalpasan a mapukpukawda.
