LAOAG CITY – Mairekreklamo ti maysa a road widening project iti Barangay 22 San Cristobal iti ili ti Sarrat gapu kadagiti naisullat a kaykayo iti kanal.
Gapu iti daytoy, inpakaammo ni Barangay Chairman Banuar Malaqui iti nasao a barangay a nangitunda daytoy ti panaglayus iti lugar.
Inbatadna a sakbay a nangrugi ti proyekto iti barangayda idi Hunio ket immunan a napukan dagiti kayo a madalapus iti pannakaipalawa ti kalsada.
Nupay kasta, inlawlawagna a saan a naikkat nga insigida dagiti napukan a kayo nga adda iti paset kadagiti kanal isut gapuna nga alisto ti panagngato ti lebel ti danum nangruna iti paset ti barangay hall-da idi iduduprak ti Bagyo Kiyapo iti kallabes.
Kunana a saanna a ma-contact ti kontraktor iti nasao a proyekto tapno agkiddaw ti tulong iti pannakaiplastar dagiti kaykayo a naisullat kadagiti kanal.
Innayonna a nagtutulagan dagiti opisial ti Barangay San Cristobal a mangisayangkat ti clean-up drive ngem inadmitirna a saan nga umdas daytoy a wagas gapu ta dadakkel dagiti kayo.
Kabayatanna, naipadanonen daytoy a damag ken ni Mayor Ralph Conrad Medrano iti ili ti Sarrat no sadinno nga inpanamnamana nga idanonna met daytoy a banag iti Department of Public Works and Highways para iti al-alisto a pannakasolbar iti nasao a problema.
