LAOAG CITY – Maysa nga agtawen iti 95 a mannalon idiay United Kingdom ti nasdaaw idi maisubli kenkuana ti mapukpukawna a Rolex watch kalpasan ti 50 a tawen.
Idi 1950, rinegaloan ni James Steele ti bagbagina ti Rolex watch para iti 21st birthday-na. Nausarna daytoy iti naunday a panawen ngem kalpasan ti 20 a tawen, napukawna daytoy kabayatan nga agtartrabaho iti kataltalonan idiay Shropshire, England.
Dakkel ti atapna a naregregna daytoy manipud iti imana kabayatan nga agpakpakan ti tarakenna a baka. Sinapulna daytoy ngem saanna a nakita ken inpagarupna a nairaman a nakan ti bakana ti relona.
Ita a 2024, immasideg ti metal detectorist a ni Liam King iti apoko ni Steele ken nagkiddaw daytoy ti pammalubos nga ag-treasure hunt iti talonda. Pinalubusanda daytoy ket ditoy a nabirukanda ti Rolex watch ni Steele.
Saanen nga agtaytayyek ti relo ken ti leather bracelet daytoy ket napukawen. Awanen ti planona nga ipatarimaan daytoy ni Steele gapu ta posible a dakkel ti magastosna. Kalikagumna laengen ket i-display daytoy kas remembrance.
