LAOAG CITY – Saan a pannakaibelleng a nasayaat ti rungrung ti sigarilyo ti makitkita a rason ti napasamak nga uram iti pagtaengan iti Barangay 21, San Pedro ditoy ciudad ti Laoag.
Segun kenni Fire Senior Inspector Ronald Castillo, ti City Fire Marshall ti BFP-Laoag, awan ti makita da a rason iti electrical wirings a posible kuma a namunganayan ti insidente.
Inlawlawag na a mabalin a ti agas asok pay laeng a rungrung ti sigarilyo ket naibelleng kadagiti karton nga isu ti nangrugyan ti apoy.
Ummuna iti daytoy, kunana nga iti pannakisarsarita da kenni Aaron Paul Agustin, idi rumuar manipud iti Comfort room idi rabii ket nakita na nga addan ti apoy iti kwarto na rason a dagus na a sinebseban.
Nupay kasta, inbatad na a nakadanonen ti apoy iti atep a labig ti pagtaengan a rason a nagramram ti apoy.
Mainaig iti daytoy, kunana nga agarop 100 a ribo a pisos ti mapatta-patta a balor dagiti nadadael iti nasao nga uram.
