LAOAG CITY – Nangiwayat manen ti drone attacks ti Russia ken Ukraine a nagpatnag iti baet nga adda ti manamnama a panagtataripnong da United States President Donald Trump ken Russian President Vladimir Putin idiay Alaska inton Biernes.
Inbatad ni Ukrainian Air Force a 100 a Russian drones ti naiwayat no sadinno a 70 ti na-intercept ti pagilian.
Kabayatanna, kuna ti Russia a 126 nga Ukrainian drones ti napabagsakda.
Gapu iti daytoy, temporario a sinuspenso ti Russia dagiti flight kadagiti sumagmamano nga eropuerto iti Vladikavkaz, Grozny, Saratov ken Kaluga.
Naammoan a maysa a tao ti naipadamag a natay ken sumagmamano ti nasugatan iti Saratov a tinamaan ti drone ti pagtaenganna pakairamanan ti pannakadadael ti maysa nga oil refinery.
Kinumpirmaran met daytoy ti Ukrainian General Staff ken kunana a target-da ti oil refinery nga us-usaren ti Russian forces.
Inpetteng ti Ukraine a paset daytoy ti estratehiada tapno pakapsoten ti militar ken ekonomia ti Russia.
Kabayatanna, nagpirman ti joint statement dagiti lider ti France, Germany, United Kingdom ken Poland kas suporta iti Ukraine.
