LAOAG CITY – Tinagabassit laeng ti Russia ti nagbalin a pangta ni United States President Donald Trump a nasken nga agsungbat daytoy iti ceasefire deal iti Ukraine.
Inbatad ni Trump iti panagbisitana idiay Scotland a nasken nga agingga iti 10 nga aldaw ket umannugoten ti Russia ti ilunglungalong ti Estados Unidos a ceasefire.
Naammoan a ti nasao a pangta ket bimmaba manipud iti dati a 50 nga aldaw a naipaay iti Russia ken no saanda nga umannugot ket patawan isuda ti nadagsen a taripa.
Inpetteng ti Russia nga agingga saan a masurot ti kondisionda ket saanda nga agtungpal iti nasao a deadline a dinakamat ni Trump.
Maipalagip a sumagmamano a daras a nagsarita ti dua a pagilian ngem nagtalinaed nga awan ti nagbanaganna.
