LAOAG CITY – Pinakdaaran ni Russian President Vladimir Putin iti South Korea a maibilang kas dakkel a biddut no suportaranda ken suplayan ti armas ti Ukraine kontra Russia.
Daytoy ti inpablaak ni Putin kalpasan nga impasimudaag ti Seoul nga ikonsiderarna ti posibilidad a mangsuporta iti Ukraine kas sungbat iti baro a katulagan ti Russia ken North Korea nga agtinnulong kontra iti aniaman nga “aggresion”.
Innayon pay ni Putin a situtulok ti Moscow a mangsuporta iti Pyongyang no agtultuloy ti panangsuplay ti Estados Unidos ken dagiti kaalyadona iti Ukraine.
Maipalagip nga imun-una a kinondenar ti Seoul ti katulagan ti Russia ken North Korea kas maysa a pangta iti national security, no sadinno a kinuna ni national security adviser Chang Ho-jin a plano-da ti mangpanunot kadagiti wagas a mangsuporta iti Ukraine.
Kabayatanna, inpetteng met ni United States national security council’s spokesman John Kirby a masapul nga ikonsiderar iti katulagan ti Russia ken North Korea, a taginayonen ti talna ken kinatalged dagiti tattao iti Rehion.
