LAOAG CITY – Inpalgak ni Engr. Teresa Bacnat, ti OIC iti provincial Agriculture Office a saan a mabalin a mapagbalin a cash imbes a pestisidyo ti ipaay ti gobierno a paset iti fertilizer subsidy program.
Segun kenni Bacnat, dagiti ayuda ti gobierno ket maipapaay kas in-kind no sadinno ket mabalin nga abuno, machinery ken dadduma pay.
Inlawlawag na a mabalin met a mapagbalin pay laeng nga stock ti maawat nga abuno ken mausar to manen daytoy iti sumaruno a panagmula ti pagay.
Mainaig iti daytoy, inbatad ni Bacnat a no adda ti pannakaladaw ti pannakaipaay ti ayuda ket adda met ti rason a kas iti wrong entry wenno saan a consistent iti data a naisubmitir bayat ti panagrehistro iti RSBSA.
Kuna ni Bacnat a no adda dagiti saan a nakaawat ket umasideg da laeng kadagiti municipal agriculture officer gapo ta dagitoy ti kangrunaan a mangtaming kadagiti problema dagiti mannalon.
Kabayatanna, inbatad ni Bacnat a ti panagngato ti presyo ti gasolina ken nababa a presyo ti irik ket saan a makontrol.
Nupay kasta, adda met ti ar-aramiden ti gobierno tapno matulungan dagiti mannalon.
