LAOAG CITY – Inbatad ni Gov. Matthew Marcos Manotoc a saan a mabalin a pagbalinen ti entrance fee kas membership fee iti Ferdinand Edralin Marcos Stadium.
Segun ken ni Gov. Manotoc, saan a mabalin a maipatungpal daytoy iti Ferdinand Edralin Marcos Stadium gapu ta maibilang daytoy kas maysa a public space a mabalin a gundawayan amin nga umili ken saan nga umannugot a mapagbalin nga ekslusibo laeng para kadagiti sumagmamano a mapan bumisita iti lugar.
Nupay kasta, inlawlawagna a napinpintas no agbayad iti 30 a pisos ti tunggal indibidual a sumrek para iti pannakamentenar iti nasao a pasdek.
Maipalagip nga inaprobaran ni Gov. Manotoc iti naipasa nga ordinansa iti Sangguniang Panlalawigan a pannakasingir iti entrance fee kadagiti sumrek iti Ferdinand Edralin Marcos Stadium.
Kabayatanna, naammoan a masirsirmata ti pormal a pannakalukat ti maibilang a maysa kadagiti kadakkelan nga sports center ti pagilian inton Pebrero 1 ita a tawen.
