LAOAG CITY – Mamati ni Dr. Marierose Tolentino a saan a marukod ti balligi ti maysa nga indibidual iti kuarta wenno aniaman a sanikua.
Segun kenkuana, ubing pay laeng ket arapaapnan ti agbalin a doktor tapno makatulong a mangtaming kadagiti masaksakit wenno agsagsagaba ti nakana a sakit kas ti kanser.
Inbatadna nga ad-adda pay a naaddaan daytoy ti gagar a mangala ti kurso a medisina idi nagsagaba ti sakit a kanser ti mismo nga inana.
Inlawlawagna a kas maysa a doktor ket ibilangna a naindaklan a panagballigi no makitana a nagimbag dagiti pasiente a nagpakonsultar kenkuana.
Mainaig iti daytoy, kunana a gapu ta asideg isuna iti panagtulong iti benneg ti salun-at ket nagbalinen a nakadawyanna ti agidonar ti dara tapno makasilpo ti biag iti maysa a tao.
Innayonna a saan nga alisto ti kapadasanna gapu ta napadasanna pay ti naglako iti tiendaan agingga idi kolehio daytoy tapno adda laeng ti maurnongna a kuarta a mangsupusop iti inaldaw-aldaw a kasapulanna iti panagadal iti kolehio.
