LAOAG CITY – Inlawlawag ni Ms. Helen Rose Molina Domingo, ti Sports Consultant, Sports Development Council ditoy probinsia a maipagarup a kinakurang ti komunikasion ti Asia Pacific Charter ti rason no apay saan a nagtuloy dagiti atleta ti Ilocos Norte Diamond Baseball idiay Florida, United States of America.
Segun kenkuana, mangisayangkat da koma ti panagtataripnong ita nga aldaw, Oktubre 3 tapno mailawlawag a nasayaat ti rason no apay saan a nagtuloy dagiti ubbing iti nasao a pagilian ngem awan ti nagatendar kadaytoy.
Namunganay daytoy iti pannakapaay dagiti nagannak dagiti 14 nga atleta ti baseball team ti Ilocos Norte Diamond Baseball kalpasan a maipakaammo kadakuada a saanda nga agtuloy iti baet ti sumurok maysa a bulan nga insagsaganaan dagiti annakda ti kompetision iti ballasiw taaw.
Nupay kasta, kunana a ti rason ti saanda a panagtuloy ket ti kinakurang komunikasion ti Asia Pacific Charter iti Office of the Governor.
Kunana a ti Ilocos Norte Diamond Baseball team ket nagay-ayam iti babaen ti Perfect Game Philippines nga idadauloan ti Asia Pacific Charter no sadinno a daytoy ti agipatulod kadagiti kangrunaan a communication letters tapno makikoordinar iti Office of the Governor Cecilia Araneta Marcos.
Gapu iti kinakurang ti communication letters, saanda a masinunuo dagiti kasapulan a financial details ken dadduma pay a kangrunaan a masapol iti baet ti naiget met a panagsagsaganada.
Nagkiddaw ti Asia Pacific Charter ti P3,850 iti tunggal atleta ngem apaman daytoy ket awan ti letter nga inpaayda iti Office of the Governor tapno masuportaran daytoy.
Nupay saanda a nagipatulod ti letters, nagsagana latta ti Sports Development Council kadagiti dadduma pay a kasapulan dagiti ubbing nga atleta.
Iti baet ti kinakurang ti communication letters, nagtuloyda latta nga agisagana ngem kunana a na-deny dagiti sumagmamano nga indibidual a mangasikaso kadagiti ubbing isut gapuna a saanda a makaipatulod ti atleta iti ballasiw-taaw nga awan ti naan-anay a mangkita kadagitoy.
Kabayatanna, iti met biang dagiti pannakapaay dagiti nagannak, kunana a saan a nasayang dagiti oportunidad gpu ta uray kastoy ti napasamak ket agtultuloyda latta a mangpapigsa kadagiti atleta iti pakabuklan a potensial dagitoy.
