LAOAG CITY – Saan a nagbalin a tubeng ken ni Atty. Jo Ericka Marquez, taga ili ti Bacarra ngem agdama da nga agnanaed ditoy ciudad ti Laoag ti sitwasyon na iti pananggun-od na ti arapaap na nga agbalin nga abogada.
Ni Atty. Marquez ket maibilang a Person with Disability (PWD) gapu ta saan a makapagna ken naka-wheelchair a mapmapan idi iti pagadalan.
Inbatad ni Marquez a no nagaget ken napigsa ti patinakem ket awan iti impossible iti aniaman nga arapaap iti biag.
Nagyaman met ni Marquez gapu ta awan ti napasaran na a driskriminasyon gapu iti kasasaad na.
Inistorya na nga idi damo na ti sumrek iti Law School iti Northwestern University ditoy ciudad ti Laoag ket dinamag laeng kenkuana ti Dean no kasanu na nga idalan ti panagbasa na gapu ta iti 2nd floor iti classroom da.
Nupay kasta, babaen ti tulong ti pamilya na ken dagiti kaeskwelaan na ket kinabaelan na ti nagadal agingga a nagturpos ken ita naan-anayen nga abogado gapu ta maysa isuna kadagiti nagasat a nakapasa ti bar exam.
Inpakaammo na a napanunot na laeng ti agadal ti kina-abogasya idi nagturposen ti kolehiyo tapno maamoan no agingga kaano ti kabaelan na nga aramiden.
Kabayatanna, saan pay a maibaga ni Atty. Marquez no ania ti sumaruno nga aramiden na kalpasan a nakapasa ti bar exam gapu ta kair-iruwar pay laeng ti resulta ken agtultuloy ti mapaspasaran a krisis ti pagilyan gapu iti covid-19 pandemic.
